पीएमपी प्रवासी महिलांच्या पिशवीतून तीन लाख रुपयांचे दागिने लंपास

पुणे (ऑनलाइन न्यूज परिवर्तनाचा सामना)

स्वारगेट तसेच सहकारनगर परिसरात पीएमपी प्रवासी महिलांच्या पिशवीतून ३ लाख रुपयांचे दागिने चोरून नेल्याची घटना घडली.

याप्रकरणी स्वारगेट आणि सहकारनगर पोलीस ठाण्यात गुन्हा दाखल करण्यात आला.  पहिल्या घटनेत तक्रारदार या हिंगोली जिल्ह्यातील वसमतमधील आहेत. त्या कामानिमित्त १६ नोव्हेंबर रोजी पुण्यात आल्या होत्या.

हडपसर ते स्वारगेट या मार्गावरील बसमधून त्या प्रवास करत होत्या. बसमध्ये गर्दी होती.चोरट्यांनी महिलेच्या पिशवीतून २ लाखांचे सोन्याचे दागिने चोरून नेले. स्वारगेट स्थानकात महिला बसमधून उतरली. तेव्हा पिशवीतून दागिने चोरीला गेल्याचे उघडकीस आले.

पोलीस उपनिरीक्षक एस. पी. राठोड तपास करत आहेत. तर, पुणे-सातारा रस्त्यावर पीएमपी प्रवासी महिलेच्या पिशवीतून ९२ हजारांचे दागिने चोरीला गेल्याची घटना २९ नोव्हेंबर रोजी घडली.

तक्रारदार महिला मूळच्या नवी मुंबईतील पनवेलच्या रहिवासी आहेत. त्या शिवाजीनगर ते कात्रज या मार्गावरील बसमधून प्रवास करत होत्या. चोरट्यांनी महिलेच्या पिशवीतून ९२ हजारांचे दागिने चोरून नेले.

पोलीस कर्मचारी राऊत तपास करत आहेत.पीएमपीएल बस ही पुणेकरांच्या रोजच्या आयुष्यातील एक महत्वाचा भाग आहे. लाखों पुणेकर रोज याने प्रवास करतात.

पुणेकरांची “जीवनवाहिनी” असलेली पीएमटी अन् त्याचे बस थांबे सध्या चोरट्यांचे अड्डे झाल्याचे वास्तव आहे. गेल्या काही महिन्यांपासून पुन्हा एकदा चैन स्नॅचर टोळ्यांनी उचलखाली असून, बसमधील आणि थांब्यावरील गर्दीत महिला व ज्येष्ठांना टार्गेटकरून त्यांच्याकडील मोबाईल व दागिने चोरून नेत असल्याच्या धक्कादायक घटना घडत आहेत.