कोथरूडमध्ये दारूच्या नशेत तरुणांचा राडा: माझी आमदार किरकोळ जखमी

पुणे: कोथरूडमधील सहजानंद सोसायटीजवळ दारू पिण्यासाठी बसलेल्या तरुणांना जाब विचारल्याचा राग आल्यामुळे त्यांनी भाजपच्या माजी आमदार मेधा कुलकर्णी यांना धक्काबुक्की केली. कुलकर्णी यांच्या हाताला किरकोळ जखम झाली आहे. या प्रकरणी पोलिसांनी दोघांना जेरबंद केले आहे ही घटना शनिवारी संध्याकाळी साडेपाचच्या सुमारास घडली. एका महिलेनं या संदर्भात पोलिसांकडे तक्रार दिली आहे. त्यानुसार, काही तरुण शनिवारी संध्याकाळी सहजानंद सोसायटीच्या बाहेर दारू पीत बसले होते. तक्रारदार महिलेचे सासरे तिथूनच कुत्र्याला घेऊन फेरफटका मारत होते. नशेत असलेल्या या तरुणांनी त्या गृहस्थाला हटकले आणि कुत्रा अंगावर सोडतो काय, असं म्हणून बाचाबाची सुरू केली. त्यामुळं घाबरून संबंधित गृहस्थ तिथून निघाले. मात्र या तरुणांनी त्यांचा पाठलाग केला आणि त्यांना बाटली फेकून मारण्याचा प्रयत्न केला. यावेळी झालेला आरडाओरडा ऐकून दोन तरुण धावत आले. पण त्यांनाही चौघांनी दारूड्या तरुणांनी मारहाण केली. हे भांडण सोडवण्यासाठी तक्रारदार महिला पुढं आली असता तिला ढकलून देण्यात आलं. काहीतरी मोठी गडबड असल्याचं लक्षात येताच माजी आमदार मेधा कुलकर्णीही तिथं पोहोचल्या. त्यांच्यासोबत सोसायटीतील इतर लोकही आले. मात्र, नशेत असलेले हे तरुण ऐकण्याच्या मनस्थितीत नव्हते. त्यांनी सर्वांनाच धक्काबुक्की करत बघून घेण्याची धमकी दिली. या झटापटीत मेधा कुलकर्णी यांच्या हाताला किरकोळ दुखापत झाली आहे. कोथरूड पोलिसांनी या प्रकरणी अमर बनसोडे, विनोद गंदे, तेजस कांबळे आणि मिथुन हरगुडे यांच्यावर मारहाण व विनयभंगाचा गुन्हा दाखल करण्यात आला आहे. पोलिसांनी चौघांपैकी दोघांना ताब्यात घेतलं आहे.

Latest News