PUNE: पंतप्रधान नरेंद्र मोदी PUNE दौऱ्यासाठी एकूण 5000 पोलिसांचा बंदोबस्त…

पुणे -ऑनलाईन परिवर्तनाचा सामना –

मोदी यांना मंगळवारी (ता.१) लोकमान्य टिळक पुरस्कार प्रदान करण्यात येणार आहे. तसेच पंतप्रधानांच्या हस्ते विविध विकासकामांचे उद्घाटन करण्यात येणार आहे. या सर्व कार्यक्रमांच्या पोलिस बंदोबस्ताची पोलिस तसेच प्रशासनाने आखणी केली आहे.पंतप्रधान नरेंद्र मोदी पुण्यात येणार असल्याने मंगळवारी शहरात कडक बंदोबस्त ठेवण्यात येणार आहे. पंतप्रधानांच्या सुरक्षेची जबाबदारी असलेले विशेष सुरक्षा पथक (एसपीजी), फोर्सवनचे जवान बंदोबस्तासाठी तैनात असणार आहे. पंतप्रधानांच्या दौऱ्यासाठी एकूण पाच हजार पोलिसांचा बंदोबस्त असेल.पोलिस आयुक्त रितेश कुमार, सहपोलिस आयुक्त संदीप कर्णिक, अतिरिक्त आयुक्त प्रवीणकुमार पाटील, रामनाथ पोकळे, विशेष शाखेचे उपायुक्त पी. राजा आदींनी बंदोबस्ताची आखणी केली आहे. तर परिमंडळ एकचे पोलिस उपायुक्त संदीपसिंह गिल मध्यभागातील बंदोबस्ताची जबाबदारी सांभाळणार आहेतविशेष सुरक्षा पथकाने पंतप्रधानांच्या सुरक्षेचा आढावा घेतला आहे. हेलिकॉप्टर उतरण्याचे ठिकाण (हेलिपॅड), कार्यक्रम स्थळ, तसेच पंतप्रधानांचा ताफा ज्या मार्गाने जाणार आहे. त्या मार्गाची पाहणी करण्यात आली.

वाहतूक व्यवस्थेत होणार बदल –

पुरस्कार आणि विकासकामांच्या व्यतिरिक्त पंतप्रधान श्रीमंत दगडूशेठ हलवाई गणपती मंदिरात दर्शनासाठी जाणार आहे. या सर्व प्रवासादरम्यान त्यांच्या वाहतुकीत अडथळा निर्माण होवू नये म्हणून मंगळवारी शहरातील वाहतूक व्यवस्थेत काही बदल करण्यात येणार आहेत.शिवाजीनगर पोलिस मुख्यालयातील मैदानावर विविध विकासकामांचे उद्घाटन केले जाणार आहे. पोलिस मुख्यालयातील कार्यक्रम सर्वांसाठी खुला असणार आहे. तेथे दहा हजार जणांसाठी बैठक व्यवस्था उपलब्ध करून देण्यात येणार आहे.

राज्य राखीव पोलिस दलाच्या तीन तुकड्या बंदोबस्तास –

पंतप्रधान मोदी यांचा दौरा एकदिवसीय असणार आहे. विमानाने ते लोहगाव येथील हवाई दलाच्या विमानतळावर उतरणार आहे. तेथून ते हेलिकॉप्टरने शिवाजीनगर येथील कृषी महाविद्यालयाच्या मैदानावर पोचतील. त्यानंतर ते वाहनातून कार्यक्रमस्थळी पोचणार आहेत. पंतप्रधानांच्या दौऱ्यासाठी राज्य राखीव पोलिस दलाच्या तीन तुकड्या बंदोबस्तास राहणार आहेत. फोर्स वनचे पथके बंदोबस्तास असणार आहेत.