पुण्यातील घटना “कार्टून” लावले नाही म्हणून आत्महत्या

पुणे : कार्टुन पाहू न दिल्याच्या रागातून १३ वर्षाच्या मुलाने गळफास घेऊन आत्महत्या केल्याचा धक्कादायक प्रकार बिबवेवाडी येथे घडला आहे. या मुलाने घरातील वरच्या खोलीत जाऊन स्कार्फने गळफास घेऊन आत्महत्या केली. बिबवेवाडीतील मंगळवारी दुपारी दीड वाजण्याच्या सुमारास हा प्रकार घडला. याबाबत पोलिसांनी दिलेल्या माहितीनुसार, या १३ वर्षांच्या मुलाने नुकताच ७ वीच्या वर्गात प्रवेश केला होता. मंगळवारी सकाळपासून तो कार्टुन पहात बसला होता. त्यामुळे त्याच्या घराच्यांनी त्याला अनेक वेळा कार्टुन पाहून नको, असे सांगितले. तरी त्याने कोणाचे ऐकले नाही. शेवटी टीव्ही बंद करुन घरातले सर्व जण बाहेर गेले. टीव्ही बंद केल्याने रागात हा मुलगा वरच्या खोलीत गेला. तेथे त्याने स्कार्फच्या सहाय्याने गळफास घेऊन आत्महत्या केली. घरातील लोक परतल्यानंतर त्यांनी हा मुलगा बराच वेळ खाली आला नाही, म्हणून त्याला पाहण्यासाठी गेले असताना त्याने गळफास घेतल्याचे आढळून आले. त्याला तातडीने जवळच्या रुग्णालयात नेले. परंतु, डॉक्टरांनी त्याचा मृत्यू झाल्याचे सांगितले. कार्टुन पाहू न दिल्याने मुलाने केलेल्या आत्महत्येची माहिती परिसरात समजताच लोकांकडून हळहळ व्यक्त केली जात आहे.