संपूर्ण महाराष्ट्रात OBC आरक्षणासाठी 26 जून रोजी चक्का जाम आंदोलन करणार – पंकजा मुंडे

मुंबई | महाविकास आघाडीच्या चुकीमुळे ओबीसींचं आरक्षण गेलं आहे. राज्य सरकारने ओबीसींचं राजकारण संपवलं आहे. त्यामुळेच या सरकारला धडा शिकवण्यासाठी आम्ही येत्या 26 जून रोजी चक्काजाम आंदोलन करणार असल्याचं पंकजा मुंडे म्हणाल्या. ओबीसी नेत्यांची जवळपास तीन तास बैठक पार पडली. बैठक पार पडल्यानंतर पंकजा मुंडेंनी माध्यमांशी संवाद साधला. ओबीसींचं आरक्षण घालवून ठाकरे सरकारने ओबीसींच्या भविष्याचा खेळ खंडोबा केला आहे. त्याविरोधात येत्या 26 जून रोजी संपूर्ण महाराष्ट्रात चक्का जाम आंदोलन करण्यात येईल, असं भाजप नेत्या पंकजा मुंडे यांनी म्हटलं आहे. विरोधी पक्षनेते देवेंद्र फडणवीसांच्या निवासस्थानावर ओबीसी नेत्यांची बैठक पार पडलीओबीसींना आरक्षण मिळणार नाही तोपर्यंत राज्यात कोणत्याही निवडणुका होऊ देणार नाही. तसा निर्णयच आजच्या बैठकीत घेण्यात आला असल्याची माहिती पंकजा मुंडेंनी दिली. मराठा आरक्षणा पाठोपाठ ओबीसी आंदोलनावरून राजकीय वातावरण तापलं आहे. दरम्यान, सरकारला भरपूर अधिकार असतात. त्यावेळी आमच्याकडे निर्णयक्षमता होती. योग्य निर्णय घेण्याची आमची नियत होती. त्यामुळे आम्ही हे आरक्षण टिकवून ठेवण्यासाठी आम्ही पावलं टाकली असल्याचं पंकजा मुंडे म्हणाल्या.