पिंपरी चिंचवड शहर भाजप शहराध्यक्षपदी कोणाची वणीं लागणार…

ऑनलाईन परिवर्तनाचा सामना – पिंपरी-चिंचवड भाजपचे शहराध्यक्ष तथा आमदार महेश लांडगे यांचा शहराध्यक्षपदाचा कार्यकाळ संपुष्टात आला आहे. त्यामुळे आता भाजप शहराध्यक्षपदी कोणाची वणीं लागणार, याकडे सर्वांचे लक्ष लागले आहे. दरम्यान, चिंचवड विधानसभा पोटनिवडणूकीत शंकर जगताप यांनी आपल्या नेतृत्वाची चुणूक दाखवली. ते भाजपच्या विजयाचे शिल्पकार ठरले होते. त्यामुळे आता शंकर जगताप यांच्याकडे शहराध्यक्षपदाची जबाबदारी दिली जाणार का? हे पहावे लागणार आहे.

शहराध्यक्षपदाचा कार्यकाळ संपल्यानंतर भारतीय जनता पार्टीच्या पक्षश्रेष्ठींनी दुसऱ्यांदाही दिवंगत आमदार लक्ष्मण जगताप यांनाच शहराध्यक्ष होण्याचा आग्रह धरला होता. परंतु, त्यांनी विनम्रतापूर्वक नकार देत दुसऱ्या कोणाला तरी शहराध्यक्षपदी संधी देण्याची सूचना केली. दिवंगत आमदार लक्ष्मण जगताप यांनी शहराध्यक्षपद नाकारल्यानंतर भारतीय जनता पार्टीच्या नेत्यांनी भोसरीचे आमदार महेश लांडगे यांच्याकडे या पदाची जबाबदारी सोपवली. त्यांचाही शहराध्यक्षपदाचा कार्यकाळ संपला आहे.

त्यामुळे पिंपरी-चिंचवड भारतीय जनता पार्टीमध्ये शहराध्यक्ष बदलाच्या हालचाली सुरू झाल्या आहेत.राज्यात भाजपमध्ये पुनर्रचना होणार असल्याने पिंपरी-चिंचवड भाजपमध्येही खांदेपालट होणार आहे

. २०१४ च्या विधानसभा निवडणुकीनंतर पिंपरी-चिंचवडमध्ये भारतीय जनता पार्टीला अच्छे दिन आले. चिंचवड मतदारसंघाचे दिवंगत आमदार लक्ष्मण जगताप हे शहरातील भाजपचे पहिले आमदार म्हणून निवडून आले. त्यानंतर त्यांच्याकडे भारतीय जनता पार्टीने शहराध्यक्षपदाची जबाबदारी दिली. या संधीचे सोने करत दिवंगत लक्ष्मण जगताप यांनी २०१७ मध्ये पिंपरी-चिंचवड महापालिकेत भाजपची प्रथमच सत्ता आणून दाखवली. त्यांनी स्पष्ट बहुमतासह महापालिकेत भाजपचे कमळ फुलवले.भारतीय जनता पार्टीचे प्रदेशाध्यक्ष चंद्रशेखर बावनकुळे यांनी प्रदेश भाजपमध्ये पुनर्ररचना होणार असल्याचे सांगितले आहे. त्यानुसार पिंपरी-चिंचवड भाजपमध्येही खांदेपालट होणार असल्याचे बोलले जात आहे.भाजपचे चिंचवड विधानसभा निवडणूक प्रमुख शंकर जगताप यांना शहराध्यक्षपद देण्यासाठी राज्यातील वरिष्ठ नेत्यांनी हिरवा कंदील दाखवला असल्याची चर्चा राजकीय वर्तुळात सुरु आहे. दिवंगत आमदार लक्ष्मण जगताप यांच्या निधनामुळे चिंचवड विधानसभा मतदारसंघात नुकतीच पोटनिवडणूक झाली. त्यामध्ये भाजपचा विजय झाला. या विजयाचे खरे शिल्पकार शंकर जगताप असल्याचे उघड आहे.

शंकर जगताप नसते तर चिंचवड मतदारसंघात भारतीय जनता पार्टीची कसब्यासारखी अवस्था झाली असती, असे राजकीय जाणकारांचे मत आहे. त्यामुळे पिंपरी-चिंचवड भारतीय जनता पार्टीला शहरात आणखी एक नेतृत्व मिळाल्याचे बोलले जात आहे. त्यांची चिंचवड आणि पिंपरी विधानसभा मतदारसंघावर मजबूत पकड आहे. त्यामुळे आगामी महापालिका निवडणुकांच्या पार्श्वभूमीवर भारतीय जनता पार्टीच्या शहर नेतृत्वाची धुरा शंकर जगताप यांच्याकडे सोपवली जाणार असल्याची जोरदार चर्चा आहे.