पुण्यातील अनधिकृत शेड्स व इमारती पाडण्यात येणार असल्याची विधान परिषदेत उद्योग मंत्री डॉ. उदय सामंत यांची घोषणा

(ऑनलाइन न्यूज परिवर्तनाचा सामना)

पुणे शहरात दिवसेंदिवस वाढत असलेल्या अनधिकृत बांधकामांविरोधात राज्य सरकारने मोठा निर्णय घेतला आहे. गुरुवार पेठ परिसरासह अन्य भागांतील परवानगीविना उभारलेली शेड्स व इमारती पाडण्यात येणार असल्याची घोषणा उद्योग मंत्री डॉ. उदय सामंत यांनी विधान परिषदेत केली आहे. त्यामुळे शहरात मोठ्या प्रमाणावर उभारण्यात आलेल्या बेकायदेशीर बांधकामांवर आता कारवाईचा बडगा उगारला जाणार आहे.

पुण्यात विविध भागांमध्ये मोठ्या प्रमाणावर अनधिकृत बांधकामे उभी राहिली असून, अनेक ठिकाणी ते धोकादायक देखील ठरत आहेत. यावर वेळोवेळी स्थानिक नागरिकांनी तक्रारी केल्या असूनही कारवाई झाली नाही, अशीही तक्रार होती. आता मंत्र्यांच्या या घोषणेनंतर महापालिका व संबंधित यंत्रणांकडून तातडीची कारवाई अपेक्षित आहे.राज्य सरकारच्या या पावलामुळे पुणेकरांना कायदेशीर आणि सुरक्षित बांधकामांचा लाभ मिळण्याची शक्यता आहे.

तसेच, भ्रष्टाचार आणि दुर्लक्ष करणाऱ्या अधिकाऱ्यांवरही लगाम बसेल, असा विश्वास नागरिकांनी व्यक्त केला आहे.

विधान परिषदेचे सदस्य योगेश टिळेकर यांनी पुण्यातील अनधिकृत बांधकामांच्या मुद्द्यावर लक्षवेधी उपस्थित केली होती. या चर्चेत सदस्य सदाभाऊ खोत आणि अभिजित वंजारी यांनीही सहभाग घेतला

. यावर प्रत्युत्तर देताना डॉ. सामंत यांनी प्रशासनाच्या निष्क्रियतेवरही प्रश्नचिन्ह उपस्थित करत चौकशीचे संकेत दिले.

उद्योग मंत्री सामंत यांनी विधान परिषदेत स्पष्ट केलं की, धार्मिक स्थळांच्या अधिकृत बांधकामांना कोणताही त्रास दिला जाणार नाही. मात्र ज्या इमारती परवानग्यांशिवाय उभारल्या गेल्या आहेत, त्यांच्यावर तात्काळ सुनावणी घेऊन पाडकामाची कारवाई केली जाईल.