पुण्यातील घटना: पती आणि नातेवाईक यांना कंटाळून घेतली फासी

पुणे : विवाहितेचा छळ करून तिला आत्महत्येस प्रवृत्त केल्याप्रकरणी विवाहितेचा पती आणि अन्य दोन महिलांच्या विरोधात फरासखाना पोलिस स्टेशनमध्ये गुन्हा दाखल करण्यात आला आहे. या प्रकरणी सपना चव्हाण (वय ३४, रा. नाना पेठ) यांनी तक्रार दिली आहे. अमोल मोहिते (रा. गणेश पेठ) असे गुन्हा दाखल करण्यात आलेल्या व्यक्तीचे नाव आहे. तक्रारदार चव्हाण यांची बहीण चांदणी अमोल मोहिते (वय ३०) हिचा विवाह अमोल बरोबर झाला होता. अमोलने आपल्या नातेवाइकांच्या मदतीने चांदणीचा छळ केला. घरात स्वयंपाक करीत नाही. दुधाचे, लाइट बिलाचे पैसे देत नाही या कारणांसह जुगार आणि दारू पिण्यासाठी पैसे देण्यासाठी चांदणीचा शारिरीक आणि मानसिक छळ केला, असे या तक्रारीमध्ये म्हटले आहे. याला कंटाळून चांदणीने राहत्या घरातील पंख्याला दोरी बांधून गळफास घेऊन २१ मे रोजी आत्महत्या केली, अशी माहिती पोलिसांनी दिली. पुढील तपास सहायक पोलिस निरीक्षक अभिजित पाटील करीत आहेत.