6 व 7 मार्च e-EPIC डाऊनलोड करण्याबाबत विशेष शिबिराचे आयोजन

मतदारांना e-EPIC डाऊनलोड करण्यासाठी

6 व 7 मार्च रोजी विशेष शिबिराचे आयोजन

पुणे, दि. 5 :-  जिल्हयातील विधानसभा क्षेत्रातील सर्व निर्धारित स्थळे, मतदान केंद्रांवर शनिवार दिनांक 6 व रविवार दिनांक 7 मार्च या सुट्टयांच्या दिवशी e-EPIC डाऊनलोड करण्याबाबत विशेष शिबिराचे आयोजन करण्यात आले असल्याची माहिती उप जिल्हा निवडणूक अधिकारी मृणालिनी सावंत यांनी प्रसिध्दी पत्रकाद्वारे दिली आहे. e-EPIC डाऊनलोड करण्याची सुविधा राष्ट्रीय मतदार सेवा पोर्टल व मतदार सहायता ॲपद्वारा उपलब्ध करुन देण्यात आली आहे. 1 जानेवारी 2021 या अर्हता दिनांकावर आधारित विशेष संक्षिप्त पुनरिक्षण कार्यक्रमांतर्गत ज्या मतदारांनी त्यांचा एकल (Unique) मोबाईल क्रमांक नोंदविलेला आहे, अशा सर्व मतदारांनी e-EPIC डाऊनलोड करुन घ्यावे, असे आवाहनही प्रसिध्दी पत्रकान्वये करण्यात आले आहे.

क्रीडा प्रमाणपत्र वैधतेसाठी

क्रीडा कार्यालयाशी संपर्क साधण्याचे आवाहन

पुणे, दि. 5 :-  दिनांक 1 जुलै 2016 पासून 5 टक्के खेळाडूंना वितरीत करण्यात आलेल्या क्रीडा प्रमाणपत्र वैधतेबाबत दिनांक 23 मार्च 2021 रोजी सकाळी 10.30 वाजता उपसंचालक, क्रीडा व युवक सेवा यांच्या दालनामध्ये प्रमाणपत्राची फेरपडताळणी करण्यात येणार आहे, असे क्रीडा व युवक सेवा उपसंचालक विजय संतान यांनी प्रसिध्दी पत्रकान्वये कळविले आहे.क्रीडा कार्यालयाकडून वितरीत करण्यात आलेल्या पॉवरलिफ्टींग, स्क्वॅश, सॉफ्टबॉल, कनोईंग अँड कयाकिंग, सेपकटकरा, आईस हॉकी या क्रीडा प्रकारातील प्रमाणपत्राची पडताळणी यावेळी करण्यात येणार आहे. सर्व खेळाडू व संघटनेचे अध्यक्ष, सचिव यांनी त्यांच्याकडे असलेल्या क्रीडा स्पर्धेच्या अहवालासह सुनावणीकरीता उपस्थित रहाण्याचे आवाहन उपसंचालक श्री. संतान यांनी केले आहे.