पिंपरी-चिंचवड महापालिकेच्या बांधकाम परवानगी विभागातील अधिकाऱ्यांवर भ्रष्टाचाराचे आरोप…
- पिंपरी-चिंचवड महापालिकेच्या बांधकाम परवानगी विभागातील अधिकाऱ्यांवर भ्रष्टाचाराचे आरोप
- भाजप नगरसेवक तुषार हिंगे यांची मुख्यमंत्री देवेंद्र फडणवीस यांच्याकडे थेट तक्रार
- मुख्यमंत्र्यांनी महापालिका आयुक्तांना दिले प्रकरणाच्या सखोल चौकशीचे आदेश
पिंपरी-चिंचवड (ऑनलाईन परिवर्तनाचा सामना)- मिळालेल्या माहितीनुसार, भाजपचे नगरसेवक तुषार हिंगे यांनी बांधकाम विभागाचे सहशहर अभियंता आणि कार्यकारी अभियंता यांच्या कामकाजाबाबत मुख्यमंत्री फडणवीसांकडे तक्रार केली होती. संबंधित अधिकारी अनेक वर्षांपासून बांधकाम परवानगी विभागात कार्यरत असून अधिकारांचा गैरवापर करून नागरिकांची आर्थिक पिळवणूक करत असल्याचा आरोप हिंगे यांनी आपल्या तक्रारीत केला आहे.तसेच, बांधकाम विभागाकडे मंजुरीसाठी दाखल केल्या जाणाऱ्या नस्तींमध्ये जाणीवपूर्वक तांत्रिक अडचणी, उणिवा आणि त्रुटी काढून मंजुरी प्रक्रियेला विलंब केला जातो, असा दावा तक्रारीत करण्यात आला आहे.
विकास प्रकल्पांमधील जागांचा मूळ नकाशा किंवा रस्ता बदलणे, मंजूर आरक्षणाचे कारण सांगणे, कागदपत्रांमध्ये कायदेशीर अडथळे निर्माण करून नागरिकांची मानसिक व आर्थिक पिळवणूक केली जात आहे, असेही या तक्रारीत नमूद करण्यात आले आहे. या तक्रारीची दखल घेत मुख्यमंत्र्यांनी चौकशीचे आदेश दिल्यानंतर महापालिका आयुक्तांनी संबंधित अधिकाऱ्याला कारणे दाखवा नोटीस बजावली आहे.पिंपरी-चिंचवड महापालिकेच्या बांधकाम परवानगी विभागातील अधिकाऱ्यांवर आर्थिक गैरव्यवहार आणि भ्रष्टाचाराचे आरोप करण्यात आले होते. या आरोपांची चौकशी करण्याचे आदेश मुख्यमंत्री देवेंद्र फडणवीस यांनी महापालिका आयुक्तांना दिले आहेत. मुख्यमंत्र्यांच्या आदेशानंतर आयुक्तांनी संबंधित कार्यकारी अभियंत्याला कारणे दाखवा नोटीस बजावली आहे.
शहर अभियंता, मुख्य अभियंत्यांच्या कामकाजाचे फेरवाटप
दरम्यान, पिंपरी-चिंचवड महापालिकेतील शहर अभियंता आणि मुख्य अभियंत्यांच्या कामकाजाचे फेरवाटप करण्यात आले आहे. शहर अभियंता मनोज सेठिया यांच्याकडे पाणीपुरवठा, बांधकाम परवानगीसह पाच विभागांची जबाबदारी देण्यात आली आहे. तर मुख्य अभियंता प्रमोद ओंभासे यांच्याकडे महत्त्वाच्या स्थापत्य विभागासह विविध पाणी प्रकल्पांची जबाबदारी सोपवण्यात आली आहे. याबाबतचा आदेश महापालिका आयुक्त विजय सूर्यवंशी यांनी जारी केला आहे.
शहर अभियंता म्हणून सेठिया यांची नुकतीच नियुक्ती झाली आहे. पर्यावरण विभागाचे मुख्य अभियंता संजय कुलकर्णी यांना निलंबित करण्यात आल्यानंतर ओंभासे यांच्याकडे पर्यावरण विभागाची अतिरिक्त जबाबदारी देण्यात आली होती. या पार्श्वभूमीवर आयुक्तांनी कामकाजाचे फेरवाटप केले आहे.
क्षेत्रीय अधिकाऱ्यांचीही बदली महापालिकेच्या ‘ह’ क्षेत्रीय अधिकारी पूजा दूधनाळे यांची भूमी आणि जिंदगी विभागाच्या प्रशासन अधिकारीपदी बदली करण्यात आली आहे. त्यांच्याकडे वैद्यकीय विभागाच्या प्रशासन अधिकारीपदाचा अतिरिक्त पदभारही देण्यात आला आहे. दरम्यान, संतोष कोराड यांच्याकडे ‘ह’ क्षेत्रीय अधिकारीपदाचा अतिरिक्त पदभार सोपवण्यात आला आहे.
कोणाकडे कोणते विभाग?
शहर अभियंता मनोज सेठिया यांच्याकडे पुढील विभाग सोपवण्यात आले आहेत :
– पाणीपुरवठा
– बांधकाम परवानगी
– शहरी दळणवळण
– जलनिस्सारण
– झोपडपट्टी पुनर्वसन
याशिवाय तळवडे येथील जैवविविधता उद्यान, संभाजीनगर येथील बहिणाबाई चौधरी प्राणिसंग्रहालय, वाकड येथील बॅडमिंटन कोर्ट, पिंपरी चौकातील माता रमाई सृष्टी आणि प्राधिकरणातील मदनलाल धिंग्रा मैदान या विशेष प्रकल्पांची जबाबदारीही त्यांच्याकडे देण्यात आली आहे.
मुख्य अभियंता प्रमोद ओंभासे यांच्याकडे महत्त्वाचे स्थापत्य, स्थापत्य प्रकल्प, उद्यान व क्रीडा आणि पर्यावरण अभियांत्रिकी विभाग सोपवण्यात आले आहेत. तसेच भामा-आसखेड, आंद्रा पाणी योजना, पवना बंदिस्त जलवाहिनी आणि निगडी सेक्टर क्रमांक २३ येथील जलशुद्धीकरण केंद्र या महत्त्वाच्या प्रकल्पांची जबाबदारीही त्यांच्याकडे देण्यात आली आहे.
सहशहर अभियंता प्रेरणा सिनकर यांच्याकडून जलनिस्सारण विभाग काढून त्यांच्याकडे बांधकाम परवानगी आणि अनधिकृत बांधकाम विभागाची जबाबदारी देण्यात आली आहे. सहशहर अभियंता विनय ओहोळ यांच्याकडे जलनिस्सारण विभाग कायम ठेवून पर्यावरण अभियांत्रिकीची जबाबदारी सोपवण्यात आली आहे.
कार्यकारी अभियंता संध्या वाघ यांना पदोन्नती देऊन सहशहर अभियंता करण्यात आले असून, त्यांच्याकडे स्थापत्य प्रकल्प विभागाची जबाबदारी देण्यात आली आहे.
