पिंपरी चिंचवडमध्ये ही थरारक घटना, दारुच्या नशेत हत्या…

पिंपरी : दारुच्या नशेत असलेल्या व्यक्तीची गळा चिरुन हत्या झाल्याची धक्कादायक घटना उघडकीस आली आहे. पुणे जिल्ह्यात पिंपरी चिंचवड शहरातील नेवाळे वस्ती भागात ही घटना घडली. मात्र हत्या कोणी आणि का केली, हे अद्याप स्पष्ट झालेलं नाही. वीरेंद्र वसंत उमरगी असं खून झालेल्या व्यक्तीचे नाव आहे. वीरेंद्र उमरगी यांचे पत्नीशी भांडण झाले होते. त्यामुळे मागील तीन महिन्यांपासून ते विभक्त राहत होते

वीरेंद्र यांना दारु पिण्याचे व्यसन होते. दारु पिणारे मित्र त्यांच्याकडे ये-जा करत असल्याची माहिती समोर येत आहे. दोन दिवसांपासून त्यांचे घर बंद होते. त्यांच्या एका मित्राने फोन केला पण वीरेंद्र यांनी उचलला नाही. त्यामुळे मित्राने वीरेंद्र यांच्या घरी येऊन पाहिले असता त्यांचा मृतदेह आढळून आला. वीरेंद्र यांची दारुच्या नशेत हत्या झाल्याचे प्राथमिक चौकशीत निष्पन्न झाले असून आरोपी फरार झाले आहेत

.

पिंपरी-चिंचवड मधील सांगवी भागात महिलेने राहत्या घरी गळफास लावून आत्महत्या केल्याची घटना नुकतीच समोर आली होती. त्याच ठिकाणी रक्ताने माखलेली एक डायरीही आढळली होती.मिळालेल्या माहितीनुसार पिंपरी चिंचवडमधील सांगवी या भागात एका महिले स्वत:च्या घरात गळफास लावून आत्महत्या केली. आत्महत्या करण्यासाठी महिलेने तिच्याच ओढणीचा उपयोग केला. या घटनेमुळे पिंपरी चिंचवड या भागात एकच खळबळ उडाली. विशेष म्हणजे महिलेने आत्महत्या नेमकी का केली, हे समजू शकलेले नाही.

घरातील विद्युत हिटर आपल्या छातीस कवटाळून विवाहितेने आत्महत्या केली. हिटरचा शॉक लागल्यामुळे महिलेचा मृत्यू झाला. पुणे जिल्ह्यातील दौंड तालुक्यातील यवतमध्ये ही धक्कादायक घटना उघडकीस आली आहे. विवाहित महिलेने सासरच्या जाचाला कंटाळून आत्महत्या केल्याचा आरोप आहे. धनश्री अजित करडे असे दौंड तालुक्यातील यवतमधील मयत महिलेचे नाव आहे. चारचाकी गाडी घेण्यासाठी महिलेला सासरी त्रास दिला जात असल्याचा आरोप केला जात आहे. हुंड्याची मागणी करुन तिला शिवीगाळ, दमदाटी करुन मानसिक आणि शारीरिक छळ देत होते. सासरच्या जाचाला कंटाळून तिने आत्महत्या केल्याचा दावा केला जात आहे. या प्रकरणी यवत पोलीसांनी मयत विवाहित महिलेची सासू, नवरा, दीर आणि नणंद अशा चौघा जणांवर आत्महत्येस प्रवृत्त केल्या प्रकरणी यवत पोलिस ठाण्यात गुन्हा दाखल करण्यात आला आहे.