फडणवीसांचा विरोधकांवर हल्लाबोल; ‘संविधानाच्या नावाखाली संस्थांना बदनाम करण्याचा प्रयत्न’

मुंबई : (ऑनलाईन परिवर्तनाचा सामना) काँग्रेस आणि इंडिया आघाडीकडून सुरू असलेली आंदोलने ही संविधानविरोधी असून, देशातील संवैधानिक संस्थांविषयी जनतेच्या मनात अविश्वास निर्माण करण्याचा प्रयत्न केला जात आहे, असा आरोप मुख्यमंत्री देवेंद्र फडणवीस यांनी केला. दिल्ली आणि मुंबईत मुख्य निवडणूक आयुक्त ज्ञानेश कुमार यांच्याविरोधात सुरू असलेल्या आंदोलनाच्या पार्श्वभूमीवर त्यांनी विरोधकांवर जोरदार टीका केली.

फडणवीस म्हणाले की, निवडणूक आयोग, रिझर्व्ह बँक आणि नियंत्रक व महालेखापरीक्षक (CAG) यांसारख्या संस्थांना कुचकामी ठरवण्याचा प्रयत्न होत आहे. या संस्था जनतेला न्याय देऊ शकत नाहीत, असा नॅरेटिव्ह तयार करून लोकांना संस्थांविरोधात भडकवले जात असल्याचा दावाही त्यांनी केला.

सर्वोच्च न्यायालयावर दबाव आणण्याचा आरोप

सर्वोच्च न्यायालय हे संविधानातील सत्ताविभाजनाच्या तत्त्वानुसार स्वतंत्र आहे. न्यायालयाचे काम दाखल केलेल्या याचिकांवर सुनावणी घेणे आहे; मोर्चांना सामोरे जाणे किंवा आंदोलकांना भेटणे नव्हे, असे फडणवीस यांनी स्पष्ट केले. सरन्यायाधीशांनी आंदोलकांना भेटण्यास असमर्थता दर्शवली असून, याचिका दाखल केल्यास त्यावर सुनावणी होऊ शकते, असेही त्यांनी सांगितले.

सोशल मीडियावर सरन्यायाधीशांविरोधात आक्षेपार्ह मजकूर प्रसारित केला जात असल्याचा आरोप करत, अशा प्रकारांमुळे सर्वोच्च न्यायालयाची प्रतिमा आणि स्वायत्तता कमकुवत करण्याचा प्रयत्न होत असल्याचे फडणवीस म्हणाले.

इंदिरा गांधींच्या आणीबाणीचा संदर्भ

संविधानाच्या मुद्द्यावर बोलताना फडणवीस यांनी 1975 मधील आणीबाणीचा संदर्भ दिला. तत्कालीन पंतप्रधान इंदिरा गांधी यांच्या काळात मूलभूत अधिकारांवर निर्बंध आले होते आणि न्यायालयीन दाद मागण्यावरही मर्यादा आल्या होत्या, असे ते म्हणाले. बाबासाहेब आंबेडकरांनी दिलेल्या संविधानाचे संरक्षण करण्यासाठी आम्ही कटिबद्ध आहोत, असा इशाराही त्यांनी विरोधकांना दिला.

जंतर-मंतरवरील आंदोलनादरम्यान सोशल मीडियावर मोठ्या प्रमाणात पोस्ट प्रसारित झाल्याचा उल्लेख करत, काही सोशल मीडिया प्लॅटफॉर्मना संसदीय समितीसमोर बोलावण्यात आले होते, असा दावा फडणवीस यांनी केला. पोस्टचा प्रसार वाढवण्यासाठी पैसे दिले जात असल्याचे संबंधित प्लॅटफॉर्मने मान्य केल्याची माहितीही त्यांनी दिली. या निधीचा स्रोत परदेशी असण्याची शक्यता असल्याचेही त्यांनी नमूद केले.

‘आंदोलन मॅन्युफॅक्चर्ड’; फडणवीसांची टीका

काँग्रेसला अनेक राज्यांत राजकीय अपयशाचा सामना करावा लागत असून, आगामी काळात सत्तेत येण्याची शक्यता कमी असल्याने विरोधक अस्वस्थ आहेत, असा दावा मुख्यमंत्र्यांनी केला. आंदोलनासाठी लोकांना नियोजनबद्ध पद्धतीने एकत्र केले जात असल्याचा आरोप करत त्यांनी या आंदोलनाला ‘मॅन्युफॅक्चर्ड’ म्हटले.

दरम्यान, संविधान, निवडणूक प्रक्रिया आणि संवैधानिक संस्थांच्या भूमिकेवरून सत्ताधारी आणि विरोधकांमधील राजकीय संघर्ष अधिक तीव्र होण्याची चिन्हे आहेत.